LAOAG CITY – Nabenepisiaran dagiti 100 nga manipud nagduduma a barangay ditoy siudad ti Laoag.
Dagitoy ket dagiti ubbing a daakel ti tsansana nga agbalin a malnourished no sadinno nga insayangkat ti Provincial Government of Ilocos Norte (PGIN) iti babaen iti Provincial Nutrition Action Office (PNAO) iti Brgy. 37 Calayab ditoy siudad ti Laoag.
Impakaammo ni Mrs. Elma Irapta, ti mangidaulo ti Provincial Nutrition Action Officer a dagitoy ket kinuyog dagiti nagannak kadakuada.
Kunana a daytoy ket nagbibinnuligan ti Provincial Government of Ilocos Norte (PGIN), Provincial Nutrition Action Office (PNAO), Provincial Social Welfare and Development Office (PSWDO), Environment and Natural Resources Office (ENRO), Office of Provincial Agriculture (OPAG), Provincial health Office (PHO), Philippine Carabao Center (PCC), Department of Science and Technology, ken nagduduma pay nga ahensia.
Segun kenkuana, daytoy ket kas paset ti pannakaselebrar ti nutrition month no sadinno a naipaayan dagiti benepisiario ti foodpack, hygiene kit, pasteurized carabao milk, nutribun, nadumaduma a bin-i a bukbukel ti natnateng, iron fortified rice ken dadduma pay.
Mainaig iti daytoy, ket kageddan ti pannakaisayangkat ti coastal clean-up ken panagmula kadagiti napatubo a bunga ti kaykayo.
Inlawlawagna a nupay saan a nakaatendar ni Governor Cecilia Araneta Marcos ket impakaammo na ti ragsakna iti panagballigi ken pannakaipatungpal ti nasao nga aktibidad iti babaen ti pangbibinnulig dagiti nagduduma a pagopisinaan iti Provincial Government of Ilocos Norte (PGIN) ken sumagmamano nga ahensia ti gobierno.
Kabayatanna, namnamaen ti gobernador ti agtultuloy a pannakapasayaat ti salun-at dagiti ubbing ditoy probinsia iti babaen ti agtultuloy a panagkakaysa iti nasao a probinsia.
