LAOAG CITY – Umaboten iti 10 ti bilang ti natay gapu iti panagreggay ti daga idiay Malapatan, Sarangani basar iti Municipal Disaster Risk Reduction and Management Office.
Karaman kadagiti 10 a natay iti Barangay Poblacion ti dua nga ubbing ken maysa nga indibidual ti naitaray iti ospital ngem naideklarar a dead on arrival.
Naammoan a dagiti biktima ket maipagarup nga aggapu iti dua a pamilia iti agsina a pagtaengan.
Basar iti Malapatan Municipal Disaster Risk Reduction and Management Office a posible a ti nangitunda ti landslide ket gapu iti napigsa a panagtudo ken ti napasamak a 7.8 a ginginned iti Sarangani idi Hunio 8.
Kagiddan ti insidente, inbilin ti local government unit ti pre-emptive evacuation kadagiti dadduma pay a pamilia nga adda iti asideg ti lugar.
