LAOAG CITY – Ibilang ni Lola Chen a blessing ti timmubo a sarana iti mugingna no sadinno a kunana a daytoy ti mangipapaay kenkuana ti atiddog a biag.
Ni Chen ket addaan ti edad a 107 nga agnanaed idiay Guangdong, China.
Adu a netizens ti nangibaga a saan nga ipapaikkat ni Lola Chen ti longevity horn gapu ta daytoy ti maipagarup a sikretona iti atiddog a biagna. Bayat a ti dadduma ket ibilangda daytoy a kas maysa nga Unicorn.
Impasigurado met ni Lola Chen nga awan ti epekto iti salun-atna ti nasao a sara.
Nupay kasta, ti kastoy a kaso ni Lola Chen ket saanen a baro. Idi 2019, adda ti maysa pay a 74 years old a lalaki manipud India a ni Shyam Lal Yadav a kapada ni Lola Chen ti situasion.
Uppat a pulgada met ti kaatiddog na ngem iti nagbaetan ti muging ken ulona ti nagtuboanna ken dakdakkel ti diameter-na no maikumparar ken ni Shyam.
