LAOAG CITY – Agtultuloy ti panangpaiget ti Philippine National Police Anti-Cybercrime Group (PNP ACG) ti kampaniada kontra kadagiti indibidual nga agus-usar ti internet tapno agiwaras ti bomb threat kadagiti pagadalan ken komunidad.
Inpasigurado ti Philippine National Police Anti-Cybercrime Group a dagiti adda iti likudan ti pammutbuteng ket mapilaan ti maiyannatop a pannusa.
Naammoan a sipud pay idi Enero ket addan ti walo a kaso dagiti online bomb threat a napilaandan ti kaso iti korte.
Ti kaudian nga insidente ket idi Hulio 8 no sadinno a nagsaruno a bomb threat ti nairekord kadagiti pagadalan idiay Cavite.
Nag-post iti social media dagiti suspek nga adda ti inmulada a bomba iti sumagmamano a pagadalan.
Inpalagip manen ti Philippine National Police Anti-Cybercrime Group iti publiko nga adda ti pagsungsungbatan iti linteg ti panagpangta ti bomb jokes wenno threats, social media man daytoy wenno aniaman a klase ti messaging apps.
Mabalin a maibalud dagiti adda iti likudan ti bomb threat ti agingga iti lima a tawen ken panagmulta nga umabot iti P400,000.
