LAOAG CITY – Inyakar ti Senate Impeachment Court inton Hulio 20 ti aldaw ti panagtestigo ni National Bureau of Investigation (NBI) Director Malvin Matibag.
Daytoy ket kalpasan a naikkan ni Matibag ti tyansana nga agtestigo sakbay ti panagbiahena para iti maysa nga official engagement sadiay Bangkok, Thailand manipud Hulio 21 agingga 22.
Iti baet ti panagsinnungbat ti agsinnumbangir a partido a nagbaetan ti depensa ken prosekusion, nagdesision ni Trial Presiding Officer Francis Escudero nga aprubaran ti nadakamat a rakurak ngem inlawlawagna a masapol nga ituloy ni Matibag ti panagtestigona agingga a makumpleto ti depensa ken prosekusion ti panangtingitingda kenkuana.
Mainaig iti daytoy, mangiparuk-at ti Senado ti subpoena ken ni Matibag tapno sumango daytoy iti Senate Impeachment court.
Manamnama nga agtestigo ni Matibag manaig iti imbestigasion ti National Bureau of Investigation (NBI) iti rakurak ni Vice President Sara Duterte idi Nobiembre 23, 2024 no sadinno ket inbatadna nga adda kinontratana nga adda mangpapatay kada Presidente Ferdinand Marcos Jr., First Lady Liza Araneta Marcos ken ti dati a House Speaker Martin Romualdez no aniaman ti madi a mapasamak kenkuana.
