LAOAG CITY – Saan a nagatendar ti Buhawind offshore wind farm iti naisayangkat a public consultation iti ili ti Burgos.
Segun ken ni Rev. Father Arvin Mangrubang ti Iglesia Filipina Independiente, saanda a masinunuo no ania ti kangrunaan a rason no apay a saan a nagpakita ti nasao a kompania iti naikeddeng a panagsasaritada.
Nupay kasta, mamati ni Mangrubang a makita ti kompania a naruay a residente ti saan nga umanamong iti planoda a mangipasdek ti offshore wind farm iti kabaybayan.
Inlawlawagna a maobserbaran ti grupoda a Saluadan nga agpilpili laeng ti kompania ti kalikagumda a kasarita a tattao maipanggep iti proyekto banag a naigetna a kwinestionaran gapu ta no public consultation ket karaman ti amin a maseknan.
Inbatadna nga addan ti sumagmamano a mangngalap, residente, kapitan ken iti sektor ti simbaan iti public consultation ngem kellaat a saan a natuloy iti saan a masinunuo a rason.
Gapu iti daytoy, inpettengna a mangipasimudaag laeng a saan a seryoso ti Buhawind offshore wind farm iti panangsurot kadagiti proseso iti pannakaipasdek ti proyekto.
Inpaganetgetna a saan a kabaelan ti kompania a sangoen dagiti tattao a maapektaran iti nasao a proyekto.
Mainaig iti daytoy, kwinestionaran ni Mangrubang ti Department of Environment and Natural Resources no apay nga immun-una pay nga inikkan ti ahensia iti napalabas a tawen ti Environmental Compliance Certificate ti Buhawind offshore wind farm ngem iti naisayangkat a public consultation.
Innayonna a naiget met a naglikudan ti Department of Environment and Natural Resources maipanggep daytoy a banag.
Maipalagip nga inpakaammo ni Mayor Cresente Garcia iti ili ti Burgos nga adda ti maisayangkat a public consultation babaen ti Buhawind offshore wind farm.
Immuna iti daytoy, saan nga umanamong ni Mayor Garcia iti pannakaipasdek ti offshore wind farm iti ili ti Burgos gapu ta naruay a residente ken mangngalap ti maapektaran.
