LAOAG CITY – Kinumpirmaran ti gobierno siudad ti Manila ti tallo a baro a kaso ti COVID-19 basar iti kaudian a report ti Water and Food-Borne Diseases, Influenza-Like Illnesses, Leptospirosis and Dengue (W.I.L.D.) monitoring-da.
Gapu iti daytoy, umaboten iti 60 ti pakabuklan a kumpirmado a kaso ti COVID-19 a nairekord iti siudad manipud Enero 1 agingga iti agdama a bulan.
Malaksid iti COVID-19, nakairekord met ti city government ti tallo a baro a kaso ti dengue isut gapuna tapno umabot iti 1,961 ti pakabuklan a bilang dagiti kaso ti nasao a sakit idiay Manila ita a tawen.
Kabayatanna, maysa a baro a kaso met ti leptospirosis ti nairekord idi Hulio 16 a nangitunda ti pakabuklan a bilang dagiti kaso daytoy iti 94 ita a tawen.
Awan ti nairekord a baro a kaso ti dadduma pay a W.I.L.D. diseases a maipadpadalan iti inaldaw-aldaw a monitoring ti gobierno siudad.
Nupay kasta, nagtalinaed ti pakabuklan a bilang dagiti kaso ti influenza-like illnesses (ILI) iti 773, severe acute respiratory infections (SARI) iti 240, typhoid fever iti 57 ken tallo iti cholera.
Mainaig iti daytoy, nagpalagip manen ti Manila Health Department (MHD) iti publiko a kanayon nga agan-annad kontra kadagiti W.I.L.D. diseases nangruna ita a panawen ti panagtutudo.
