LAOAG CITY – Rugyanan ti Department of Social Welfare and Development (DSWD) inton sumaruno a lawas ti pannakaipaay ti ayuda kadagiti kuwalipikado a benepisiario ti Unified Package for Livelihood, Industry, Food and Transport (UPLIFT) Program.
Segun ken ni Department of Social Welfare and Development (DSWD) Secretart Rex Gathalian, umabot iti 7.5 million ti marigrigat, near-poor ken low-income a pamilia iti pakabuklan ti pagilian ti mabenepisiaran iti nasao a programa.
Gagem ti program a tulungan dagiti pamiliya iti epekto ti panagngato ti presio ti langis ken ti naideklerar nga energy emergency.
Tallo a grupo ti maipaayan ti ayuda:
– 3.5 million benepisiario ti Pantawid Pamilyang Pilipino Program (4Ps) ken Walang Gutom Program;
– 2.5 million a marigrigat ken near-poor a pamilya nga adda ti listaan ti Philippine Statistics Authority (PSA) iti babaen ti Community- Based Monitoring System (CBMS); ken
-1.5 million a low-income a miembro ti Social Security System (SSS);
Dagiti benipisiario ti Pantawid Pamilyang Pilipino Program (4Ps) ken Walang Gutom Program ket maipaayan ti a P2,000.
P2,000 met tunggal bulan ti maipaay kadagiti kualipikado a pamilya iti Community- Based Monitoring System (CBMS) ken dagiti miembro ti Social Security System manipud Hulio agingga Disiembre.
Segun ken ni Gatchalian, insigida nga agturong ti ayuda ti 4Ps iti Landbank wenno Gcash accounts-da.
Kabayatanna, makaawat ti ayuda iti naikeddeng a food redemption dagiti benipisiario ti Walang Gutom Program.
Para kadagiti benepisiario ti Community- Based Monitoring System (CBMS), mairugi pay laeng ti manual payout tapno maberipekaran ti identity-da ken mairehistro ti digital payment accounts-da sakbay nga umakar iti digital a panangbayad.
Impaganetget ni Gatchalian a ti listaan dagiti benepisiario ket aggapu laeng iti Philippine Statistics of Authority (PSA) ken awan ti makibiang nga opisial iti panangpili dagiti maipaayan.
Inlawlawagna nga inramanda dagiti near-poor gapu ta maysa da a naapektaran no adda krisis wenno dagos a panagngato ti gastosen.
Basar iti Department of Social Welfare and Development (DSWD), gagem ti napalawa nga UPLIFT program a pasardengen ti sumurok kumurang 1.2 million a Pilipino a mabaybay-an nga agbalin a nakurapay gapu iti agtultuloy a panangngato ti presio ti langis ken sabali pay a magatang.
