LAOAG CITY – Pimmaspas ti garaw ti Tropical Depression Kiyapo bayat ti panaggarawna nga agturong iti amianan a laud ti Philippine Sea, daya nga amianan ti Luzon.
Basar iti state weather bureau, naudi a nasaripatpatan ti sentro ti bagyo itay 10:00 AM iti kaadayo ti 830 a kilometro iti dayaen a paset ti amianan ti Luzon.
Addaan daytoy ti kapigsa ti angin nga umabot iti 45 km/h nga asideg iti sentro ken pumigsa agingga 55 km/h bayat ti panagggarawna nga addaan ti kinaalisto a 25 km/h.
Makaapektaran ti napigsa nga angin agingga 400 a kilometro manipud iti sentro ti bagyo.
Kabayatanna, karaman kadagiti lugar nga adda iti Tropical Cyclone Wind Signal (TCWS) No. 1 ti Batanes, Cagayan, Babuyan Islands Isabela, Apayao, Abra ken Kalinga. Naakuparanna pay ti dayaen ti Mountain Province kas iti Paracelis, Natonin, Barlig, Sadanga, Bontoc, Besao ken Sagada. Karaman pay dagiti lugar ti dayaen ken sentro ti Ifugao a pakairamanan ti Mayoyao, Aguinaldo, Alfonso Lista, Banaue, Hingyon, Lagawe ken Lamut. Adda pay iti listaan ti Ilocos Norte, amianan a paset ti Ilocos Sur kas iti Cabugao, Sinait, San Juan, Magsingal, Santo Domingo, Bantay, San Ildefonso ken San Vicente. Malaksid iti daytoy, karaman pay ti amianan a paset ti Aurora (Dilasag, Casiguran) amiananen ti Quirino (Aglipay, Maddela, Cabarroguis, Saguday, Diffun) ken ti amianan a paset ti Nueva Vizcaya (Bagabag, Diadi).
