LAOAG CITY – Nagkiddaw ti Department of Agriculture (DA) ti P250-bilyon a pundo para iti 2027 tapno mapapigsa ti seguridad iti taraon, pagsapulan dagiti mannalon ken mangngalap ken kinatibker ti ekonomia.
Iti Food Security Forum idiay Makati, inbatad ni Agriculture Secretary Francisco Tiu Laurel Jr. a bumaba ti ambag ti agrikultura iti gross domestic product (GDP) manipud 19% idi 2005 agingga 7.9% kalpasan ti dua a dekada gapu ta nabayagen a kinakurang ti panagpuunan iti sektor.
Segun iti sekretario, ti gakat a budget ket nangatngato maidasig iti P215 bilyon ita a 2026 ken agarup doble no idasig iti P117 bilyon idi 2022.
Mailatang daytoy para iti farm mechanization, irigasion, research, cold-chain facilities, digital infrastructure ken post-harvest systems tapno maipangato ti produksion ken maipababa ti presio ti taraon.
Agtultuloy met ti P30-bilyon a Rice Competitiveness Enhancement Fund idinto a nanayonan ti pundo ti Philippine Crop Insurance Corporation ken ti P20 bilyon a tinawen a pundo pondo para iti panagpadur-as ti livestock sector.
Kuna ti sekretario a dumur-as ti 2.6% ti agrikultura ken panagkalap idi 2025, ti kaalistoan iti uneg ti walo a tawen, kagiddan ti panagbaba ti presio ti bagas ken panagginad ti food inflation.
Nupay kasta, inadmitirna a nagtalinaed dagiti karit kas ti kinakurang iti irigasion, nangato a logistics cost ken epekto ti climate change isu a kasapulan nga agtultultoy a panagpuunan iti sektor.
