LAOAG CITY – Nagpanawagan dagiti tallo nga obispo a Katoliko iti Samar kadagiti lokal a gobierno a saanda nga annuguten ti panagmina iti Eastern Samar, kalpasan ti panangaprubar ti maysa a mineral exploration permit iti paset ti maysa a lugar ti Giporlos ken Balangiga.
Iti maysa a pastoral statement, inallukoy da Borongan Bishop Crispin Varquez, Calbayog Bishop Isabelo Abarquez ken Catarman Bishop Nolly Buco dagiti lokal a gobierno ken barangay council ti pannakapatibker kadagiti resolusionda a saan nga umannugot iti panagmina iti lugarda.
Malaksid iti daytoy, inpetteng pay dagiti obispo ti panangidakamat ni Pope Francis ti encyclical na Laudato si’ a ti umno a panagdur-as ket saan laeng a maibasar iti kuarta no diketdi panangrespetar iti dignidad ti tao, umno a panangtagibeen iti aglawlaw.
Mainaig iti daytoy, nagballaag dagiti obispo a mabalin a mangitunda ti panagmina ti pannakadadael ti aglawlaw ken watershed, mangitunda ti polusion kadagiti paggapuan ti mausar a danom ken pannakadadael kadagiti kataltalunan.
