LAOAG CITY – Manamnama ti panagangkat ti Pilipinas ti ad-ado a karne ti baka intono 2027.
Daytoy ti inbatad ti US Department of Agriculture iti baet ti ngumatngato a demand ken kinakurang ti maiyannatop a domestic production.
Iti kaudian a report, inrakurak ti Foreign Agricultural Service ti US Department of Agriculture a ti angkaten a karne ti baka ket manamnama a ngumato iti 2.4 percent iti sumaruno a tawen wenno 295,000 a metriko tonelada ti carcass weight equivalent.
Inpakaammo ti international agency a ti Indian beef ti mapatta-patta nga ad-adda a maipalawa intono 2027.
Kabayatanna, manamnama a ti Brazil ti agtalinaed a major supplier ti beef cuts iti pagilian.
