LAOAG CITY – Nangipila ni Senador Francis “Kiko” Pangilinan ti gakat a maipangato ti income tax exemption threshold manipud iti ₱250,000 ket agbalin a ₱350,000 kada tawen tapno manayunan ti take-home pay dagiti minilyon a mangmangged a Pilipino.
Iti salinong ti Senate Bill No. 2344, kalikagumna daytoy a gakat a mai-linia ti income tax exemption iti agdama a kasasaad ti pang-ekonomiya ken mapapigsa ti purchasing power dagiti pamilya.
Segun ken ni Pangilinan, ininot a kankanen ti inflation ti kuarta dagiti mangmangged bayat ti agtultuloy a panagngato ti presio dagiti naruay a magatang.
Innayonna pay a no maaprubaran ti nasao a gakat ket agbalin nga exempted iti personal income tax ti umuna a ₱350,000 a taxable income.
Malaksid iti daytoy, karaman pay ti nasao a rakurak dagiti self-employed ken professionals nga agararamat ti 8% gross receipts tax regime.
Karaman pay iti nasao a rakurak ti pannakaipangato ti thresholds ken dadduma pay a brackets: agbalin a ₱500,000 para iti 15%, ₱1 million para iti 20%, ₱2.5 million para iti 25% ken idinto nga ₱8 million met para iti 30% tax rate.
Kabayatanna, inpetteng ni Pangilinan a naka-linia daytoy a rakurak iti panawagan ni Presidente Ferdinand Marcos Jr. iti State of the Nation Address-na a pangatoen ti personal income tax exemption tapno makissayan ti problema dagiti mangmangged a Pilipino iti baet ti agtultuloy a panagngato ti presio dagiti magatang.
