LAOAG CITY – Posible a ngumato ti presio ti liquefied petroleum gas (LPG) iti sumarsaruno nga aldaw gapu iti kumarkaro a tension diay Middle East.
Basar iti LPG Marketers Association (LPGMA) a mapatta-patta a P27.50 ti mabalin a nayon iti presio ti sag-11kilogram nga LPG cylinder wenno kapada na daytoy ti sumurok-kumurang P2 iti tunggal kilo.
Nupay awan pay opisial a price adjustment ti Department of Energy, kuna ti LPG Marketers Association (LPGMA) a ngumato ti presio ti LPG iti sangalubungan a merkado gapu iti manarimaan a rinnupak iti Middle East.
Segun ken ni LPG Marketers Association (LPGMA) Founder ken Chairman Arnel Ty, naapektaran ti presio gapu iti tension iti baet ti Estados Unidos ken Iran a nakaapektar iti sangalubungan a suplay ti LPG.
Gapu iti daytoy, kunada pay a posible nga awan ti rollback iti presio ti LPG kadagiti sumarsaruno a bulan gapu ta mangrugi ti winter stockpiling iti nagduduma a pagilian.
Kabayatanna, madanagan dagiti dadduma a negosiante a nangirakurak a posible nga ipasada kadagiti umuli ti nayon ti gastos tapno natalined ti operasion-da.
