LAOAG CITY – Masdaaw ti Department of Justice (DOJ) no apay a nagwaras dagiti damag a naarestaren ni Sen. Ronald dela Rosa.
Inbatad ni Department of Justice Secretary Eric Vida nga inbilinnan ti National Bureau of Investigation (NBI) tapno ammoen no sadinno ti naggapoan daytoy.
Kunana a posible a plano laeng nga iyaw-awan ti inaramid ti nangiwaras iti daytoy.
Inlawlawagna nga iti agdama ket awan pay ti update maipanggep iti panangarestar iti Senador nga idi pay Mayo a naudi a nakita kalpasan a naglibas iti Senado.
Maipalagip nga idi Martes idi nagwaras ti impormasion a maipagarup a naarestaren ni Dela Rosa.
Nupay kasta, kuna ni Department of the Interior and Local Government (DILG) Secretary Jonvic Remulla a dumalan iti proseso ti panangarestar ken ni Bato ken awan ti palimed nga operasionda.
Ni Dela Rosa ket arestaren iti bileg ti warrant manipud iti International Criminal Court gapu iti panagbalin a kakunsabo ni dati a Presidente Rodrigo Duterte iti inpatungpal a war on drugs ti napalabas nga administrasion.
