LAOAG CITY – Nagpanawagan ni Pope Leo XIV nga isardengen ti rinnupak idiay Ukraine ken respetaren ti international humanitarian law kalpasan ti umad-adu ti bilang dagiti sibilian a matmatay ken masugsugatan iti agsinnungbangir a partido.
Kuna ti Santo Papa nga isardengen ti panagatake kontra kadagiti inosente nga indibidual pakairamanan dagiti ubbing.
Basar iti datos ti United Nations, sumurok 16,000 a sibilian ti pimmusayen iti agarup uppat ken gudua a tawen iti baet ti Ukraine ken Russia no sadinno kaadoan kadagiti natay ket Ukrainian.
Inbatad ti United Nation human rights office a ngimmato ti sumurok iti 1/3 ti bilang dagiti nasugatan ken natay a sibilian iti Ukraine idi umuna a gudua ti tawen.
Nupay kasta, nangisayangkat met ti Ukraine ti serye ti drone attacks iti Russia nga adda dagiti sibilian a nairaman basar iti maysa nga opisial ti United Nations.
Iti maudi nga insidente, nadadael ti Odesa seaport iti maysa nga overnight Russia attack nga adda ti tallo nga indibidual ti nasugatan iti siudad basar ken ni Ukainian President Volodymyr Zelenskiy.
Kabayatanna, lima nga indibidual ti natay idiay Russia gapu iti maysa nga overnight Ukrainian drone attack iti siudad ti Belgorod, basar iti regional crisis center.
