LAOAG CITY – Binallaagan ti Department of Health ti publiko kontra iti sakit a leptospirosis iti baet ti agtultuloy a panagtudo iti pagilian.
Binalakadanda ti publiko a liklikan ti mapan iti layus, agsuot ti botas ken proteksion iti bagi ken apakonsultar iti doktor para iti umno nga abiso ken reseta ti agas kas ti Doxycycline prophylaxis.
Mabalin a tumawag iti National Emergency Hotline a 911 no agkasapulan ti insigida a tulong.
Kabayatanna, immunan a dinutokan ti Malacañang ti Department of Health nga agaramid dagiti addang kontra kadagiti sakit a pakaigapuanan ti panagtudo ken panaglayus.
Ginutigot met ti gobierno ti publiko a suroten ti agdama nga addang tapno maliklikan ti sakit a mabalin a maala iti layus ken agpakonsultar iti kaasitgan nga health center.
Inbatad ni Palace Press Officer Usec. Claire Castro a saan nga urayen ti pannakapasar ti sintomas, no man makapasar ti gurigor, panag-yellow ti mata wenno kudil ken dadduma pay sakbay nga agpakonsultar iti doktor iti posible a leptospirosis.
