LAOAG CITY – Agingga a saan a makita dagiti Pilipino ti pudno a panagpasungbat ken panangipasubli kadagiti tinakaw a pundo, saan a mapukaw ti pungtotda iti isyu ti flood control basar ken ni Sen. Panfilo “Ping” M. Lacson.
Saan a maikkat ti pungtot ti publiko iti isyu ti flood control iti tunggal nga adda ti napigsa a tudo ken nakaro a layus a mangpakaro iti anomalya iti nasao a proyekto.
Iti social media post ni Lacson, saan a malpas dagiti nasasakit a sarita dagiti umili kadagiti pulitiko ken dagiti opisial ken contractors ti Department of Public Works and Highways kalpasan a nalayus iti adu a kalsada gapu iti napigsa a tudo.
Inbatad ni Lacson a maikkat laeng ti pungtot ti publiko no adda ti mapatawan ti pannusa ken maisubli ti tinakaw a pundo iti flood control asinoman ti karaman iti isyu.
Maipalagip a nariing manen ti pungtot dagiti tattao iti isyu kalpasan ti panaglayus iti sumagmamano a paset ti pagilian kadagiti naglabas nga aldaw gapu kadagiti nagsasaruno a bagyo ken habagat a nangitunda ti pannakasuspenso ti klase ken serrek kadagiti trabaho ken rinibribu a pamilia ti naibakwit manipud kadagiti pagtaenganda.
