LAOAG CITY – Agdesision ni Presidente Ferdinand Marcos Jr. iti uneg ti sumagmamano a lawas no patgan ti kiddaw ti Estados Unidos nga ipa-extradite ni Kingdom of Jesus Christ (KOJC) founder Pastor Apollo Quiboloy.
Inbatad ni Palace Press Officer Claire Castro nga addan iti Presidente ti extradition request ken kasapulan daytoy ti naannad a panagadal sakbay nga agaramid ti addang, maiyataday iti linteg ken extradition treaty ti Pilipinas ken Amerika.
Posible nga itantan ti extradition ken agtalinaed pay laeng ni Quiboloy ditoy Pilipinas kabayatan ti panangimbestigar ti kasona ditoy pagilian wenno temporario nga isardeng dagiti panangusig tapno ipa-extradite idiay Estados Unidos.
Sumangsango ni Quiboloy iti kaso a qualified human trafficking iti Pasig Regional Trial Court (RTC) ken sexual abuse ken maltreatment iti Quezon City RTC.
Kabayatanna, ti panagkiddaw ti Estados Unidos ket adda ti pakainaiganna kadagiti kaso a sex trafficking of minors, visa fraud ken bulk cash smuggling nga inpila kontra kenkuana idiay California.
