LAOAG CITY – Inbatad ni Manila Rep. Bienvenido Abante a mabalin a pangibaseran ti impeachment dagiti aramid ni Vice President Sara Duterte idi nagserbi daytoy kas secretaria ti Department of Education (DepEd).
Kunana a saan a mabalin nga isina ti panagsingir ken ni Duterte kas Bise Presidente nupay inaramidna dagiti nasao nga addang idi nagserbi daytoy kas Education secretary.
Pakairamanan iti impeachment case dagiti alegasion mainaig ti panagusar ti confidential funds ti Office of the Vice President (OVP) ken Department of Education (DepEd) idinto nga iggem ni Duterte ti dua a posision.
Impaganetget ni Abante a saan nga otomatiko a natalged iti impeachment scrunity dagiti inaramid ni Duterte kas Education secretary gapu ta agtalinaed nga Bise Presidente daytoy.
Ti isyu ket napagtrataran kabayatan ti panangkonsiderar ti House prosecution panel no ikkaten ti dadduma nga alegasion tapno mapaalisto ti impeachment proceedings.
Nupay kasta, agtultuloy a tingtingitingen dagiti agpampanday linteg dagiti iregularidad nga inbatad ti state auditors iti panagusar ken liquidation ti confidential funds ti Office of the Vice President ken Department of Education.
