LAOAG CITY – Immapela ti defense team ni Bise Presidente Sara Duterte iti panagusar ti artificial intelligence wenno AI-generated images ti House prosecution panel tapno ipakita no kasano kaadu ti P125 million a confidential funds a kunada nga in-withdraw ti maysa nga special disbursing officer ti Office of the Vice President.
Basar ken ni spokesperson Atty. Michael Poa a kwinestionaranda ti panagusar ti Artificial Intelligence gapu ta mabalin a saan nga umno ti panangipresentar ti aktual a kita ken kinaadu ti P125 million a cash.
Mainaig iti daytoy, nangipakita ni private prosecutor Amando Ligutan ti AI-generated image ti agdagup P125 million pakairamanan ti 1,000 bundle a sag-125,000 a pisos a P1,000 denomination ken maysa nga AI-generated image nga uppat a duffle bag a kunada a naglaon ti P125 million.
Inlawlawag ni Ligutan a nagusarda ti teknolohia gapu ta awan ti aktual nga P125 million a cash-da tapno ipakita iti panangusig.
Impaganetget ni Ligutan a kasapulan nga umuna a siguradoen ti accuracy dagiti ladawan nga ipakita gapu ta mabalin a sobra wenno kurang ti representasion ti Artificial Intelligence iti aktual a kinaadu ti kuarta.
Nupay kasta, inbatad ni prosecution spokesperson Atty. Benjamin Tolosa Jr. a visual representation laeng daytoy tapno matulungan ti witness ken ti korte a makita no arig dagiti bundle ti kuarta ken dagiti bag a nausar iti transaksion ti naipakita a ladawan.
Kabayatanna, kunana a saanda ipakpakita ti aktual a kuarta iti panagusar ti AI generated images.
Innayonna pay nga inbaga mismo iti witness nga adda pagpadaan ti naipakita a visual representation iti kuarta a nakita ken dagiti bag a nausar iti pangikabil dagitoy.
