LAOAG CITY – Kinumpirmaran ni Dr. Rodrigo Catcatan, ti mangidaulo ti City Health Office nga adda ti 1 a kaso ti leptospirosis ditoy siudad ti Laoag.
Ti indibidual a nagpositibo ket maysa a lalaki, residente ti Barangay La Paz ken maysa a construction worker.
Segun ken ni Catcatan, daytoy ket mabalin a naalana iti panagdalyasatna kadagiti naurnong a danom iti kalsada nangruna ita ta panawen ti panagtutudo.
Inbatadna a manarimaanen ti naan-anay a pannakataming ti pasiente iti Mariano Marcos Memorial Hospital and Medical Center (MMMH&MC) iti siudad ti Batac.
Kinunana pay nga agtultuloy latta ti opisinada a mangipaay iti agas a prophylaxis a gagemna ti naan-anay a pannakaprebentar iti nasao a sakit.
Mainaig iti daytoy, nagpalagip manen ni Catcatan kontra ti leptospirosis a salwadan ti bagbgi gapu ta mabalin nga ipatay daytoy no saan nga insigida a maagasan wenno maipaayan ti naan-anay a pannakatamingna.
