LAOAG CITY – Gagem ti Pilipinas a magun-o ti dakdakkel a medal haul iti 2026 Asian Games, no sadinno a mangnamnama ti presidente ti Philippine Olympic Committee (POC) Abraham Tolentino a malabsan ti pagilian ti uppat a balitok a medalya a nagun-odna iti napalabas nga edision.
Naikeddeng ti Aichi-Nagoya Asian Games inton Setiembre 19 agingga iti Oktubre 4 idiay Japan.
Karaman ditoy ti Gilas Pilipinas kadagiti team ti Pilipinas a mangidepensa iti gold medal-na, ngem maipasango ti national men’s basketball team kadagiti karit gapu iti kinakurang ti lineup.
Nupay kasta, immun-una a kinuna ni Gilas Pilipinas head coach Tim Cone a kitkitaenda pay laeng ti team ti napigsa nga all-PBA lineup para iti gold medal bid-da.
Gapu ta sumagmamano pay a medal hopefuls ti adda iti mix, intudo ni Tolentino ni pole vaulter EJ Obiena ken dagiti agkabsat a Yulo kas kangrunaan nga atleta a buyaen. Mabalin pay nga adda iti mix ti tennis star Alex Eala no agdesision a makipagpaset daytoy.
Iti 2022 Asian Games idiay Hangzhou, China, maika-17 ti Pilipinas iti overall babaen ti uppat a balitok, dua a pirak, ken 12 a bronze medals.
