LAOAG CITY -Nadisgrasya ti maysa nga SUV ken kurong kurong iti paset ti Juan Luna Street ditoy siudad ti Laoag.
Ti SUV ket maysa nga agmaris nangisit a Hyundai Tucson nga inmaneho ni Ferdinand Peralta Llapitan, agtawen 44, awanan asawa, Brgy Councilor ken residente iti Poblacion 4 iti ili ti Pasuquin ken idinto a ti kurong-kurong ket Honda TMX 155 nga inmaneho ni Rachel Ildefonso, agtawen ti 33, awanan asawa, residente ken pakairamanan dagiti pasaherona nga isuda Amalia Cardona Ildefonso, agtawen iti 58; Catherine Ferrer Bartolome, agtawen ti 42 ken maysa a maladaga nga agtawen iti uppat a bulan a agpapada a residente ti Brgy. Cabaruan iti ili ti Bacarra.
Basar kadagiti otoridad, manarimaan nga agdaldaliasat ti SUV iti Barangay Road/ Juan Luna Street iti abagatan a direksion idi kellaat a bimmallasiw ti kurong-kurong iti diversion road manipud Daya, Lincoln Street a saan daytoy a sinurot ti right of way.
Gapu iti daytoy, aksidente a nagdinnungpar ti SUV iti kurong-kurong, a rason ti pannakaipuruak ti driver ken pasahero ti kurong-kurong manipud iti motorsiklo.
Nagsagaba ti sugat ti driver ti kurong-kurong, kaduana dagiti pasahero na ken naitaray iti Rural Health Unit (RHU) ti Pasuquin para iti naan-anay a pannakatamingda.
Mainaig iti daytoy, ti uppat a bulan a maladaga ken ni Amalia Ildefonso ket naiyakar iti Bacarra Medical Center para iti kanayonan a medikal nga atension nupay kasta, agpada a naideklarar a Dead on Arrival (DOA) iti babaen ti attending physician.
Saan a nasugatan ti driver ti SUV ken ti pasaherona. Agpada a nadadael dagiti lugan no sadinno a saan pay a nakuntar ti mapattapatta a magastos iti pannakatarimaan.
