LAOAG CITY – Inawagan ti Chinese Embassy a ‘squad tactics” ti nagbalin a rakurak ni Defense Secretary Gilbert Teodoro Jr. kalpasan ti panangakusar ni Teodoro ti Embassy nga agargaraw daytoy a public relations firm para iti Chinese businessman a ni Tony Yang a maibagbaga nga akinkukua ti Sanjia Steel Corp idiay Misamis Oriental a ni-raid dagiti otoridad.
Basar ken ni Chinese Embassy spokesperson Ji Lingpeng, imbes a sungbatanda dagiti saludsod kadagitoy, nangiruar ni Teodoro ti “baseless and sensational allegations” kontra iti embassy.
Kunada pay a rumbeng a respetaren ni Teodoro ti rule of law ken decision ti Department of Justice, a nangibasira kadagiti kaso kontra kadagiti Chinese worker ti Sanjia Streel Corp. iti Misamis Oriental.
Nupay kasta, inpaganetget ni Teodoro nga arig nagbalin nga abogado ti Chinese Embassy para ken ni Yang.
Namunganay ti napudot a panagsungbat iti baet ti Chinese Embassy ken Defense chief mainaig ti kaso dagiti Chinese national a naarestar iti maysa a manufacturing plant idiay Misamis Oriental.
Iti babaen iti social media post, inbatad ti secretario a saan a rumbeng a mangipaay ti legal advice ti embassy.
Kunana a miembro laeng ti Integrated Bar of the Philippines ti mabalin a mangted kadaytoy iti babaen ti linteg.
Innayonna pay a saan laeng nagbalin a kas Public Relations ni Tony Yang ti Chinese Embassy no diket nagbalin pay nga abogado daytoy.
Kas sungbat, sinubok ti embassy ni Teodoro a mangiruar ti ebidensia a mangsuportar dagiti alegasionna.
Inpetteng met ti Chinese Embassy a responsibilidadna a siguradoen a saan maakusaran wenno madusa nga awan umdas a pangibasaran dagiti inosente a Chinese worker.
