LAOAG CITY – Agtataripnong dagiti senador ita nga aldaw, Lunes tapno pagsaritaan ti posible a panagbalbaliw ti iskediul ti impeachment trial ni Bise Presidente Sara Duterte gapu iti pannakaitantan ti panangusig gapu iti dakes a panawen ken ti umay a deliberasion iti naisingasing a nasional a badyet para iti 2027.
Segun ken ni Sen. Erwin Tulfo, agtataripnong ti majority ken minority blocs tapno makaaramidda iti maudi a desision no iyakar ti panangusig iti malem tapno at-atiddog ti panawen para iti daytoy.
Kabayatanna, kinuna ni Sen. Panfilo “Ping” Lacson a kaaduan kadagiti senador-judges manipud iti majority bloc ti pabor iti pannakayakar ti impeachment trial iti malem mangrugi inton Setiembre 1.
Iti babaen ti naisingasing nga eskediul, maangay ti regular session ti Senado manipud 10 a.m. agingga 2 p.m. tunggal Lunes agingga iti Mierkoles, sakbay a mangrugi ti impeachment trial iti alas 2:30 ti malem ken kinunana a mabalin nga agpaut daytoy agingga iti 7:30 p.m. wenno ad-adu pay, depende kadagiti kasapulan ti panangusig.
Segun ken ni Lacson, ad-adda a praktikal daytoy a set-up gapu ta saan a kasapulan a mapaababa ti impeachment trial time tapno adda dalan ti Senate session.
Inlawlawagna pay a saan a naikeddeng nga agpatingga ti panangusig iti eksakto nga alas 7:30 ti malem ket mabalin a mapan agingga iti alas 10 wenno 11 ti rabii no kasapulan. Nupay kasta, kinunana a kasapulan pay laeng daytoy ti senador’ caucus, no sadinno a konsultar ti minority bloc.
No adda katulagan, kinuna ni Lacson a mabalin a pormal a maipakaammo ti baro nga iskediul inton Mierkoles, Agosto 26, a maitunos iti gagangay a pannakaipakaammo ti impeachment trial schedule para iti sumaruno a lawas. Ngem iti agdama, kunana nga agtalinaed ti impeachment trial iti bigat agingga inton sumaruno a lawas.
