LAOAG CITY – Binagkong ti maysa a construction worker ti maysa a helper iti Barangay Baligat iti siudad ti Batac.
Ti biktima ket agtawen ti 49 a lalaki, awanan asawa, helper, ken ti suspek ket maysa nga agtawen ti 53 a lalaki, naasawaan, construction worker, ken agpada a residente iti nadakamat a lugar.
Basar ti Ilocos Norte Police Provincial Office (INPPO) a sakbay ti insidente, nagriri ti biktima ken ti suspek iti maysa a kubo a kukua ti suspek.
Kabayatan ti panagriri, mapapati a kinabil ti biktima ti suspek iti maysa a pidaso ti tubular steel, idinto a ti kadua ti biktima, kinabilna met ti suspek iti maysa a pedaso ti kayo. Kalpasanna, pimmanaw ti biktima ken ti kaduana iti lugar.
Kalpasanna, nagsubli ti biktima iti nadakamat a lugar, a sinaruno ti kaarruba na nga agtawen ti 32. Iti isasangpetna, nakita ti kaarruba ti biktima a nakaidda iti daga nga addaan iti lone stab wound iti kannigid a paset ti barukongna.
Insigida met nga intaray ti kabsatna ti biktima iti Mariano Marcos Memorial Hospital and Medical Center (MMMHMC) para iti pannakatamingna.
Kabayatanna, nangisayangkat dagiti responding personnel ti Batac City Police Station iti hot pursuit operation, a nagresulta iti pannakatiliw ti suspek.
Narekobre ti Batac City Police Stattion ti maysa a kutsilio a mapapati a naaramat iti insidente, no sadinno nga agrukod iti agarup 25 a sentimetro ti kaatiddogna.
Iti agdama, agtultuloy ti naan-anay pay nga imbestigasion iti nasao nga insidente.
