LAOAG CITY – Naarestar ti maysa a babai kalpasan ti maipagarop a panagtakaw na iti nagduduma a produkto a kaadoan ket beauty products iti Department Store iti dakkel a mall ditoy ciudad ti Laoag.
Ti suspek ket agtawen ti 25 a babai ken residente iti ili ti Marcos.
Basar iti Ilocos Norte Police Provincial Office, kabayatan ti panagpatrolya ti security guard iti nasao nga establisimiento ket nakita na ti suspek a nangpidot ti maysa a Liquid Foundation ken bitbit na daytoy iti panagturong na iti maikadwa a kadsaaran ti mall.
Iti kaadda ti suspek iti maikadwa a kadsaaran ti mall ket nasiputan ti security guard ti panangipisok na ti item iti shoulder bag na kalpasan na ket intultuloy na ti nagsursur iti uneg agingga a nagpidot manen kadagiti nagduduma a banag, pakairamanan ti blouse, sapatos ken dadduma pay, sakbay a simrek iti fitting room.
Apaman a rimuar ti suspek manipod iti fitting room ket inbati na ti box ti sapatos ngem idi kinita ti security guard ket awanen ti karga daytoy.
Iti dayta a gundaway ket nagturungen ti suspek iti cashier tapno bayadan ti sumagmamano nga items, ngem isu metten ti iyaasideg ti security guard tapno lapdan ken kiniddaw na a kitaen ti official receipt ken no ania dagiti binayadan na.
Nakumpirmaran a sumagmamano a beauty products a pinidot ti suspek ken ti maysa a sapatos ket saanna a binayadan a dagitoy ken agbalor amin dagitoy ti P3,515.00
Kabaytanna, inbatad ni Police Lt. Col. Ryan Retotar, ti chief of police ditoy ciudad ti Laoag, a nagtalinaed ti suspek iti Philippine National Police ditoy ciudad ken sumango iti kaso a panagtakaw.
Innayon na a daytoyen ti maikatlo nga insidente ti panagtakaw iti dakkel a mall ditoy ciudad.
