LAOAG CITY – Dinadael ti Philippine Drug Enforcement Agency (PDEA) ti nasurok a 2.2 a metriko tonelada manipod kadagiti nakumpiskar da nga illegal a droga, babaen ti panangikabil da iti incineration iti waste management plant iti Cavite.
Segun iti Philippine Drug Enforcement Agency, dagiti nasao a droga ket agbalor ti P12.34 bilyon.
Inbatad ti Philippine Drug Enforcement Agency, a daytoyen ti kaadoan a balor ti droga a dinadael da ita a tawen.
Karaman daytoy ti nasurok a dua a milyon a gramo ti solid substance ken ti nasurok a 100-million milliliters ti liquid dangerous drugs.
Inpakaammo ti Philippine Drug Enforcement Agency, a dagiti droga ket pakairamanan ti nasurok a 1.7-milyon a gramo ti methamphetamine hydrocloride wenno mabigbig a shabu a mapatta-patta nga agbalor ti P12.06 bilyon.
Kaadoan kadagiti droga ket nakumpiskar iti drug operations iti Valenzuela City.
Inpasingked met ni PDEA Director General Undersecretary Isagani Nerez nga agtultuloy ti ar-aramiden da a kampanya kontra kadagiti iligal a droga iti pagilian.
