LAOAG CITY – Nakikaysa ni Presidente Ferdinand “Bongbong” Marcos Jr. iti intero a pagilian iti panangselebrar ti National Hereos’ Day wenno Araw ng mga Bayani.
Iti mensahena, inallukoy ti presidente iti tunggal Pilipino a saan laeng nga agingga iti simple a pananglagip dagiti naaramid dagiti bannuar no diket isapuso.
Kunana a rumbeng nga itandudo ti responsibilidad ti panangbukel iti pagilian nga inlaban ken dinedikar ti biag.
Malaksid iti daytoy, binigbigna pay dagiti modern heroes gapu iti kinagaget ken kinabannuarda partikular dagiti sundalo, mangisursuro, health workers, mannalon, mangngalap, overseas Filipinos ken dagiti umili nga agtultuloy a tumultulong iti padana ken agserbi para iti pagimbagan ti amin.
Indauloan ni Marcos ti panangipaay ti sabong iti Libingan ng mga Bayani iti Taguig City kaduana dagiti sumagmamano nga opisial ti gobierno ken dagiti beterano kas pammallagip ti panagdayaw kadagiti kadawyan a bannuar ti pagilian.
