LAOAG CITY – Indeklarar ti Senate impeachment court kas hostile witness ni Atty. Michael Poa, dati nga opisyal ti Department of Education (DepEd) ken agdama a miyembro ti defense team ni Vice President Sara Duterte, iti maika-21 nga aldaw ti impeachment trial ita a Miyerkoles, Setyembre 2.
Iti ruling ni impeachment court presiding officer Sen. Francis “Chiz” Escudero, pinalubusan ti prosecution nga agusar ti leading questions iti panangimbestigar ken ni Poa.
Immunan nga inbatad ti House prosecution a kiddawen na nga ideklarar kas hostile witness ni Poa gapu ta paset daytoy ti defense panel ken namnamaen nga agbalin nga adversarial iti posisyon ti prosekusyon.
Naisaang ni Poa mainaig ti Article I ti impeachment case, partikular iti maipagarop nga iregularidad iti panagusar ken liquidation ti ₱112.5 milyon a confidential funds ti Department of Education iti panangidaulo ni Duterte.
Sakopen pay ti nasao nga article ti alegasyon mainaig iti ₱500 milyon a confidential funds ti Office of the Vice President.
Bimmabara ti umuna a paset ti panagsaludsud kalpasan nga inladawan ni private prosecutor Atty. Benjamin Tolosa Jr. ni Poa kas “abogado nga awan ti ammo na”, a dagus a kinontra ni defense lead counsel Atty. Sheila Sison.
Inlawlawag ni Tolosa a saanna a gagem nga insultwen ni Poa ken ti rakurak na ket gapu iti maulit-ulit a panangibaga na dagiti immunan a panagdengngeg iti kamara de representantes nga awan ti personl nga ammo na iti panagusar ken liquidation ti confidential funds.
Inpetteng met ni Sison a mabalin koma nga agusar ti nadayaw a termino ti prosecutor.
Iti saan a nagbayag ket inbilin ni Escudero nga ikkaten iti opisyal a record ti sarit nga “abogado nga awan ti ammo na”, nga inawagan na a “discourteous, to say the least.”
