LAOAG CITY – Agtul-tuloy ti pannakikoordinar ti Philippine National Police iti ili Solsona iti pamilya ti bangkay a nakita iti karayan iti nasao met laeng nga ili.
Segun kenni PCPT Randy Damo, Chief of Police ti Solsona Municipal Police Station a manarimaan pay laeng ti panagdesion ti pamilya ti bangkay no ipadalanda iti autopsy ti biktima tapno mamaon no adda ii foul play iti pannakatayna.
Inbatdanana a basar iti istoria ti pamilya ti biktima ket masansan ti panaginom ti biktima ken maipagarup nga adda dagiti gundaway a panangranna iti bukodna a bagi.
Maipalagip a Nakita ti maysa a bangkay ti lalaki iti karayan iti Brgy. Bagbago iti ili ti Solsona iti oras ti alas-singko ti malem idi kalman, Setyembre 3.
Iti imbestigasyon dagiti otoridad, adda ti dua a lalaki a nagturong iti karayan tapno mapan da agkalap, ngem nakigtot da idi nakita da ti nakaidda a lalaki iti karayan.
Insigida a nagreport dagitoy iti Philippine National Police tapno mabigbig ti biktima.
Iti panagimbestigar dagiti otoridad ket naduktalan da a ti biktima ket agtawen ti 40 a lalaki, awanan ti asawa ken residente iti Brgy. Baresbes iti ili ti Dingras.
Basar kadagiti kabagyan ti biktima, idi Setyembre 2 ita a tawen ket nakita da ti panagin-inom na ti arak iti balay da, ngem iti dayta metlaeng nga aldaw ket pimmanaw daytoy ken saan pulosen a nagawid, agingga a nakita laengen ti bangkay na idi kalman, Setyembre 3, 2026.
