LAOAG CITY – Balligi a naarestar ti maysa a lalaki iti ili ti Solsona kalpasan a naalaan daytoy ti maysa a gramo a mapapati a shabu.
Ti suspek ket agtawen 40, naasawaan ken residente iti ili ti Solsona.
Ti pannakaarestar iti suspek ket babaen iti panangidaulo ti Solsona Municipal Police Station, Philippine Drug Enforcement Agency – Ilocos Norte Police Provincial Office ken dagiti dadduma pay nga ahensia.
Mainaig iti daytoy, nakumpiskar manipud iti suspek ti maysa a gramo a mapapati a shabu nga addaan ti standard value a PhP6,800.00 a naglaon iti tallo a heat-sealed transparent plastic sachets, ken pakairamanan pay dagiti non-drug evidences a maysa a genuine PhP1,000 bill a nausar kas buy-bust money, maysa nga agmaris ti red a lighter, maysa a box ti Marlboro Gold cigarette, maysa a live ammunition ti caliber .45 ken dua a live ammunition ti caliber 9mm.
Iti agdama, manarimaan nga adda iti kustodia dagiti otoridad ti suspek sakbay ti pannakaipila ti naananay a kaso kontra kenkuana.
