LAOAG CITY – Naarestaren ni dati a House Speaker ken agdama a Leyte 1st District Representative Martin Romualdez kalpasan a nangipaulog ti Third Division ti Sandiganbayan iti warrant of arrest gapu iti kasona a plunder.
Impatungpal dagiti otoridad ti arrest warrant kontra ken ni dati a House Speaker Martin Romualdez iti Cardinal Santos Medical Center idi Lunes, Setiembre 7, a nakaibaludanna gapu iti cardiovascular ailment ken saan a nasayaat a blood pressure.
Kinumpirmaran ni Interior Secretary Jonvic Remulla a naiserbi ti warrant ken maibilang itan ni Romualdez kas person deprived of liberty.
Segun ken ni Remulla, naitaray ni Romualdez iti ospital idi malem ti Lunes kalpasan a nangipila ti Office of the Ombudsman iti ₱7.44-billion plunder case kontra kenkuana ken dagiti tallo pay a kakaduana. Kinuna ti sekretario a segun iti anak ni Romualdez, nagsagaba daytoy iti anxiety attack.
Mainaig iti daytoy, imbilin ti korte a maipan ni Romualdez iti kustodiar ti gobierno.
Immunan iti daytoy, ket nakabirot ti Third Division ti Sandiganbayan ti probable cause ken nangipaulog iti arrest warrant ken hold departure orders kontra kada Romualdez, dati a mammanday-linteg a ni Zaldy Co, katulongan ni Romualdez a ni Joselyn Tragua Serenio, ken negosiante a ni Felicito Cristobal Guevarra.
Segun iti warrant, awan ti nairekomendar a piyansa. Gapu ta non-bailable ti nasao a plunder, manamnama a maipadalan ti booking procdure ken maibalud ni Romualdez apaman a makaruar daytoy iti ospital.
Kabayatanna, agtalinaed a nawaya ni Co kalpasan a naliklikanna ti pannakaarestarna mainaig ti kaso a plunder ken naamoan nga agsapsapul daytoy iti pagkamangan idiay Europa.
