LAOAG CITY – Kiniddaw met ni Sen. Erwin Tulfo a maidatag da Col. Raymund Lachica ken Col. Dennis Nolasco iti Senate Impeachment Court.
Daytoy ket tapno personal a masungbatanda dagiti saludsod mainaig iti panagusar ti confidential funds ni Bise Presidente Sara Duterte.
Agpada a nadakamat dagiti dua a military official iti progreso ti trial kontra ken ni VP Sara Sara gapu ta aipagarup a nakaawatda iti minilion a doliar a balor ti confidential funds para iti pannakaipatungpal dagiti programa ti Office of the Vice President ken ti Department of Education.
Segun kenni Tulfo, agpapada dagiti senador-judges a kayatda a saludsoden kadagiti dua no ayanno ti nakausaranda ti nadakamat a pondo, ken kayat dagiti korte a personal a sumango dagiti opisyales.
Maipapan met ken ni Lead Prosecutor, Rep. Gerville Luistro, nagdesionan ti House panel a saan nga ipasango ti dua a military colonel iti korte.
Kinunana a nalpasen ti lower house ti kayatda nga idatag mainaig iti mapapati nga anomalous use of confidential funds ni VP Sara ken saanen a kasapulan nga idatag dagiti dua nga opisyal.
Nupay kasta, intaginayon ni Trial Presiding Officer, Sen. Chiz Escudero, a no kasapulan a paayaban ti korte dagiti dua nga opisial, sakbay nga agdesision ti impeachment court, aramiden daytoy ti korte.
