LAOAG CITY – Pursigido ni Governor Cecilia Araneta Marcos iti kalikagum na a nasapa a panagsagana ti Provincial Government of Ilocos Norte iti mairakrakurak a panagpasar ti Ilocos Norte ti “El Niño” wenno tikag iti maudi a tallo a bulan ti tawen 2026 agingga iti umuna a tallo a bulan ti tawen 2027.
Inpakaammo na nga iti daytoy a panawen ti panagtutudo, kinataripnong na dagiti maseknan a pangopisinaan no ania dagiti maiyannatup a maaramid tapno saan a masayang dagiti naruay a danum manipud iti tudo.
Inbatad na a karaman kadagiti “short term” a plano a napagsasaritaanda ti pannakaipaay dagiti alisto a maapit a mula pakairamanan dagiti mula a makadaer iti tikag bayat a maitantandudu ti panagmula ti High Value Crops; pannakaipaay ti “fuel subsidy” makina a pagpadanum ken irrigation hose kadagiti lugar nga adda ti mabalin a pangalaan ti danum kas iti kulukol, pakairamanan ti pannakaipaay ti suporta para iti pannakaiyestablisar wenno pannakatarimaan dagiti “small farm reservoir” ken ti agtultuloy a pannakaipaay a dagus ti tulong kadagiti maapektaran ti tikag a maibasar kadagiti kasapulanda a tulong.
Segun kenkuana, dagiti “long term” a plano a napagnunumoan da ket ti pannakaiyestablisar dagiti Small Water Impounding Project, small farm reservoir, Spring Development Project, diversion dam ken Solar Powered Irrigation Systems; pannakainstolar dagiti “water harvesting facilities” kadagiti pagadalan, hospital pakairamanan dagiti pagtaengan bayat ti agtultuloy a pannakatarimaan dagiti “water system facilities” ken ti pannakaipatungpal ti kampania mainaig iti panaginut ti danum ken ti ad-adda pay a pannakapapigsa ti Provincial Command Center para iti napaspas a pannakamonitor ti sasaaden ti panawen para iti al-alisto panangipaay ti gobierno probinsyal ti tulong kadagiti maseknan.
Kabayatanna, inlawlawagna a kinasaritana payen ni National Irrigation Administrator Eddie Guillen a mangpa-check iti sasaaden dagiti Small Water Impounding Project ken dagiti dadduma pay nga irigasyon no kasapulan a makutkutan dagitoy.
