LAOAG CITY – Ilunglungalong ti Department of Agriculture (DA) ti naan-anay a pannakaipalawa ti industriya ti palm oil iti pagilian tapno makissayan ti panagbalin a dependent dagiti maang-angkat manipod iti sabali a pagilian, ken iti saan nga agbayag ket maaddaan ti lokal a pagalaan ti presko a materyales para iti nadaldalos a klase dagiti fuel.
Inbatad ni Agriculture Secretary Francisco P. Tiu Laurel Jr. iti budget hearing iti Kamara de representantes a kasapulan a mangilatang ti gobierno ti dakdakkel a pondo tapno mapadur-as ti produksyon ti palm oil, gapu ta mangnamnama ti pagilian iti importasyon ti agarop 90 a porsiyento ti pagkasapulan na.
Mainaig iti daytoy, agkidkiddaw ti Department of Agriculture ti saan a nababbaba ngem P300 milyon a pondo para iti pannakapadur-as ti palm plantation iti 2027, no sadinno a saan a nairaman daytoy iti dakkel a kantidad iti orihinal a National Expenditure Program ti departamento gapu ta kadagiti naglabas a bolan laeng a nagbalin a nalawag ti panagkasapulan para dakdakkel a suporta.
