LAOAG CITY – Inaprubaranen ti Senate Energy Committee iti panangidaulo ni Senador Erwin Tulfo dagiti naisingasing a linteg a gagemna nga aramiden a mandatory ti insurance coverage para kadagiti line worker ken ideklarar ti umuna a Lunes ti Agosto kas National Line Workers Appreciation Day.
Pakairamanan dagiti naaprubaran a gakat dagiti Senate Bill nga inpila da Tulfo, Senador Francis Escudero ken Senate President Sherwin Gatchalian tapno mabigbig ti kontribusion dagiti line worker iti panangpatalinaed ti suplay ti kuriente.
Malaksid iti daytoy, inaprubaran pay ti komite ti Senate Bill Nos. 498, 923 ken 2448, pakairamanan pay ti House Bill No. 7239 a gagemna nga ipatungpal ti mandatory insurance coverage ken dadduma pay a benepisio para iti amin a line worker.
Iti babaen dagitoy, maikeddeng ti mandatory minimum coverage para iti life, accident ken disability insurance dagiti line worker kadagiti private distribution utility, electric cooperative ken transmission wenno grid operator iti intero a pagilian.
Inpetteng ni Tulfo a napateg a maipaayan ti umdas a proteksion dagiti line worker gapu ta mairaman iti trabahoda iti panaguli kadagiti poste ken panangtarimaan dagiti linia ti kuriente aglallalo ti panawen ti bagyo, layus, ginggined ken dadduma pay a kalamidad.
Kabayatanna, naaprubaranen iti maikato a panagbasa iti KAMARA ti counterpart measure tapno maideklerar ti National Line Worker Appreication Day nga insingasing ti 25 a representatives.
Manamnama nga idasar ti Senate Energy Committee inton sumaruno a lawas ti committee report kadagiti gakat para iti sponsorship ken panangtratar iti plenario ti Senado.
