LAOAG CITY – Kinumpirmaran ni Dr. Melvin Manuel ti napasamak a pannakalmes dagiti 3 nga ubbing ken 1 kadakuada ti natay iti Barangay 33 A Lapaz ditoy siudad ti Laoag.
Ti nalmes nga ubbing ket agkabsat ti maysa ket babai nga agtawen ti 12 ken ti maysa ket lalaki nga agtawen met ti 9 idinto a ti kasinsinda a natay a biktima ket maysa a lalaki nga agtawen ti 12.
Segun kenkuana, mapan da koma makidaklis ngem bayat ti panagur-urayda ket nagdesisionan dagiti agkabsat nga agdigos iti baybay.
Mainaig iti daytoy, iti panag-estoria ni Barangay Kagawad Resty Delacruz, nagkukuyog dagiti agkabsat a mapan agdidigos no sadinno a nabati ti idig baybay ti biktma.
Saan a nagbayag, kellaat a nalmes dagitoy iti agarup 7 a kadapan ti kaunegna.
Apaman ti panakalmes da, napan inalaw ti biktima dagitoy a gapuanan ti pannakatayna.
Kunana a nalaing nga aglangoy ti biktima gapu ta sumursurot pay daytoy iti amana a mapan agkalap.
Inlawlawag ni Delacruz nga apaman ti pannakalmes, nagturong nga insigida daytoy tapno isalbar dagiti ubbing ngem saan dan a nasarakan ti biktima a nangsalbar kadagiti agkabsat.
Insigida met a nagsasaruno ti panagresponde dagiti kameng ti Philippine Coast Guard (PCG), City Disaster Risk Reduction Managment Office (CDRRMO), ken dagiti nagduduma pay a barangay officials.
Ditoy a naiwayat ti search and rescue a nagpaot iti las-od 20 agingga 30 a minutos ket idinto a nasarakan daytoy, inwayat da nga insigida ti cardiopulmonary resuscitation (CPR) ken ti amin a kabaelanda tapno maisalbar iti ubing ngem idinto a naitaray daytoy ket naideklarar a dead on arrival.
Naamoan a kadayta a gundaway ket nadawel ti baybay ken saan a mairekomendar kadagiti indibidual ti agdidigos.
Mainaig iti daytoy, inbatad ni Dr. Manuel nga adda dagiti kameng ti coast guard ngem awan ti agdama a life guard idi mapasamak ti pannakalmes.
Iti pannakisarsarita ti Bombo Radio Laoag ken iti ama ti biktima a ni Mr. Jaime Asunsion Jr., kunana nga adda daytoy iti taaw a manarimaan ti panagkalap na idi impakaammo kenkuana ti kasinsin na ti napasamak iti anakna.
Kunana nga inawis dagiti agkabsat ti anakna a mapan agdaklis ngem awan ti agdaklis kadayta a gundaway gapu ta nadawel ti baybay.
Saan a napan nagdigos ti biktima ngem idinto ta nakitana dagiti kasinsinna a malmalmes ket ditoyen a napan na inalaw dagitoy.
Nagkapetan ti agkabsat ti biktima a rason tapno mairebreb iti danom a rason ti nakatayanna.
Saan nga ekspektaren ni Mr. Asuncion a napan laeng timmulong ti anakna ngem daytoy ti rason ti nakatayanna no sadinno a kunana uray rigat laeng ti adda a paspasaren da koma basta kompleto ti pamilya na isut gapuna a saanna a maawat ti napasamak iti anakna.
Kabayatanna, nagballaag pay ni Dr. Manuel a saan a palubosan dagiti ubbing a mapan iti baybay no awan ti natataengan nangruna no underage, saan a napintas ti panawen, wenno nadawel ti baybay.
