LAOAG CITY – Inbatad ti Commission on Population and Development (CPD) a nanayunan pay ti bilang dagiti Pilipino nga agus-usar ti contraceptives.
Basar iti datos ti Commission on Population and Development, ngimmato iti 44.5% idi 2025 ti modern contraceptive prevalence rate iti pagilian manipod iti 41.8% idi 2022.
Segun ken ni Commission on Population and Development Information and Communication Management Division chief Mylin Mirasol Quiray, mangipakita daytoy nga ad-ado a Pilipino ti mangiyus-uswat ti family planning.
Nupay kasta, inbatad na nga agtalinaed paylaeng a karit dagiti saan nga umiso a pammati maipanggep iti contraceptives pills, karaman ti pammati a mangitunda ti cancer.
Mainaig iti daytoy, inpasingked ti Commission on Population and Development nga agtultuloy ti pannakikoordinar da kadagiti lokal a gobierno tapno mapalawa ti access iti usto nga impormasyon ken family planning services, aglalo kadagiti marigrigat ken geographically isolated a komunidad.
