LAOAG CITY – Naiget a kinontra ni Senator Christopher “Bong” Go ti gakat a pannakaipangato iti singir iti passport processing fee.
Kunana a maysa laeng daytoy a dagsen kadagiti umili iti agdama a makapaspasar ti nakaro a krisis iti panagbiag.
Inbatad ti Senador, a miembro ti Senate Committee on Foreign Relations, ti pannakadismayana kalpasan a nadakamat iti kallabes a panagdengngeg iti Senado ti plano ti Department of Foreign Affairs wenno (DFA) nga ingato ti singir iri regular passport fee manipud ti P950 nga agbalin nga P1,500.
Malaksid iti daytoy, inbatadna pay ti naiget a panagdanag para kadagiti Overseas Filipino Workers (OFW) ken dagiti umili a naipilitan mapan iti sabali a pagili ken agsakripisio tapno maipaay ti kasapulan dagiti pamiliada.
Segun ken ni Go nga ad-adda a maipit ken madagsenan dagiti Overseas Filipino Workers kendagiti ordinario a commuter iti gakat a panagngato ti singir kabayatan ti sangsangoen ti pagilian kadagiti rigat ti pagsapulan.
Kabayatanna, manamnama a trataren manen ti Senado ken ti Department of Foreign Affairs ti nadakamat a gakat kadagiti sumaruno a panagdengngeg tapno matingiting ti nangibasaran ti kiddaw a proce adjustment ken ti epektona daytoy iti pampubliko a sektor.
