LAOAG CITY – Nasugatan ti 11 nga indibidual gapu iti pammaltog iti ruar ti maysa a pagadalan idiay Turkey nga inwayat ti maysa nga estudiante nga agtawen ti 15.
Mainaig iti daytoy, dua nga indibidual ti adda iti kritikal a kondision kalpasan ti insidente iti bigat ti Martes, Setiembre 22.
Daytoy ket napasamak iti Inci Uzmez Vocational and Technical Anatolian High School iti western province of Manisa.
Naamoan a ti suspek ket estudiante met laeng iti nadakamat a pagadalan ken addan iti kustodiar dagiti pulis.
Nai-report nga agtagikua ti paltog ket ti ina, ama ken lolo ti suspek nga adda metten iti pagbaludan, basar ken ni Turkey Justice Minister Akin Gürlek.
Basar iti maysa a CCTV footage, makita ti suspek a magmagna ti kalsada nga iggem ti maysa a shotgun. Idinto a nakita ti panagtaray ken panaglibasna nga iggem pay laeng ti paltog kalpasan ti panagatake.
Kabayatanna, awan pay nalawag a motibo ti panagatake.
Ikarkarigatan ti gobierno no kasano a solbaren dagiti insidente ti kinaranggas iti kallabes kas daytoyen ti maikatlo a school shooting ti nadakamat a pagilian ita a tawen. Kabayatan nga awan pulos iti pakasaritaan ti school shooting iti naglabas a tawen.
Maipalagip nga dua nga school shooting idi Abril ti nangitunda ti baro a security measures para iti academic year 2026 agingga 2027, pakairamanan pay ti pinaiget a gun controls.
