LAOAG CITY – Kinumpirmaran ni Dr. Rickson Balalio, ti mangidadaulo iti Provincial Health Office nga addan ti dua a mortality rate wenno pimmusay gapu iti dengue ditoy probinisa.
Segun kenkuana, daytoy ket manipod iti ili ti Piddig ken iti ili ti Nueva Era no sadinno nga addan dagiti isaysayangkat da nga addang tapno maliklikan ti ad-ado pay nga agbalin a kaso iti nasao a lugar.
Kunana nga iyur-uray da ti report ti Provincial epidemiology tapnu pormal metten a maireport da daytoy iti Department of Health.
Innayon na nga adda ti isasayangkat da a surveillance iti tunggal ili ken ciudad ditoy probinsya kangrunaan na dagiti nakairekordan ti kaso a nasursurok ngem 2 ken 3.
Mainaig iti daytoy, nagpalagip ni Balalio a masapol nga ugalien ti “taktak” ken “taob” ken kanayon a panagdalus tapnu maliklikan ti panagwaras ti dengue virus.
Naiget met a tumultulong dagiti Rural Health Unit tapnu palagipan ken kitaen dagiti lugar a mabalin a paggapwan dagiti lamok a carrier ti dengue.
