LAOAG CITY – Inbatad ni Dr. Marlina L. Lino, ti Dean iti College of Arts and Sciences ti Mariano Marcos State University (MMSU) a maipanakkel da unay ti panagballigi ti umuna a batch dagiti nagturpos nga estudyante da iti Bachelor of Science in Psychology.
Kuna ni Lino a saan laeng a ti pannakagun-od ti unibersidad ti 100 a porsiento a passing rate iti September 2026 Psychometrician Licensure Examination no di ket adda pay ti bonus na gapu ta pito kadagiti estudyante da ti nag-top notchers.
Inlawlawag ni Lino a napanunotan da ti nangbukel ti Psychology Program idi 2022 gapu ta nakita ti Commission on Higher Education ken iti komunidad a kasapulan ti psychologist, aglalo idi kalepleppas ti pandemya.
Segun kenkuana, no maiturpos ti Bachelor of Science Psychology Program, ti umuna nga aramiden ket ti ipasa ti Psychometrician Licensure Examination, ken no itultuloy da ti ag-masteral ket isunto metten ti lisensya da a makaala iti Licensure Examination iti psychologist.
Innayon na nga aggapo metlaeng iti ngato ti nagbalin nga addang a mangidiaya ti unibersidad iti nasao a programa.
Kunana pay a paset daytoy ti sirmata ti unibersidad a paadwen dagiti programa a makatulong wenno mabalin a makapagserbi kadagiti umili.
