LAOAG CITY – Nagpositibo iti drug test iti nagbalin a subject ti buy-bust operation iti Brgy Barbar iti ili ti Pinili
Daytoy ti impakaamo ni PMAJ Tolentino Erum Jr., Chief of Police iti Philippine National Police Pinili.
Kinunana a gapu iti daytoy ket manarimaanen ti pannakaisagana dagiti dokumento tapno maipilan ti kaso a panaglabsingna iti RA 9165 wenno ti Comprehensive Dangerous Drugs Act of 2002 kontra kenkuana.
Immununan iti daytoy ket naarestar ti maysa a lalaki iti naiwayat a drug buy-bust operation iti ili ti Pinili.
Impakaamo dagiti otoridad a ti suspek ket maysa a mannalon, agtawen 50, lalaki, ken residente iti Brgy. Barbar iti ili ti Pinili.
Naala manipud iti suspek ti maysa a sachet iti mapapati a shabu nga iso ti nailako iti maysa a pulis a nagpammarang pusher-buyer ken nakumpiskar pay manipud iti ikot ti suspek ti maysa a sachet ti mapapati a shabu.
Ti nailako a maysa sachet a mapapati a shabu ket agdagsen iti 1.55 a gramo nga addaan gatad a P10,540 ken ti maysa pay a sachet ti mapapati a shabu ket agdagsen iti 1.68 a gramo nga addaan iti gatad a P11,424 ti adda iti ikot ti suspek. Malaksid kadagitoy, maysa a P500 bill ti nausar a buy-bust money ken maysa a P500 bill a peke ti nausar kas boodle money ken naala pay iti maysa a saan a selyado a sachet iti ikot ti suspek.
