LAOAG CITY – Agtultuloy pannakaiyimplementar iti single use of plastic ditoy siudad ti Laoag babaen iti Office of the City Environment and Natural Resources Office.
Segun ken ni Mrs. Mylene Pascual, mangidadaulo iti nasao nga opisina, a saan a maliklikan nga adda dagiti sumagmamano nga indibidual a nasukir maipanggep kadaytoy.
Nupay kasta, nagpalagip daytoy kadagiti umili, kangrunaan dagiti agturong iti Laoag City Public Market a mangitugot iti bukod a bag tapno isu ti usaren a pangikabilan dagiti gatangen.
Mainaig iti daytoy, kunana nga uray dagiti empleado iti Laoag City Hall ket naiget a sumursurot kadaytoy a pagalagadan.
Inpakaammona nga adda piso nga incentive wenno ensentibo dagiti empleado no agitugot ti lunch box no mapan iti panganan nga adda iti City Hall.
Kabayatanna, inpaganetget ni Pascual a masapol nga intandudo dagitoy a wagas tapno makatulong a masaluadan iti aglawlaw.
