LAOAG CITY – Nakita ti maysa a Pag-ong a dua ti ulona idiay Cape Cod, Massachusetts.
Iti agdama, manarimaan ti panang-monitor iti nasao a pag-ong dagiti beterinario iti maysa a wildlife center.
Ti bassit a diamondback terrapin ket nakita dagiti volunteer ti Mass Audubon Wellfleet Bay Wildlife Sanctuary iti maysa a protected nesting site, no sadinno naikabil daytoy idi Setiembre 17 idiay Cape Wildlife Center iti Barnstable tapno masukisok ti kondisionna.
Naiyanak ti hatchling nga addaan ti maaw-awagan a bicephaly, maysa a naidumduma a congenital condition no sadinno mangrugrugi a magudua ti embrio nga arigna mangtaud daytoy ti kambal ngem saan dagitoy a nagsina, isu ti gapuna a timmaud ti maysa nga ayup a dua ti ulona.
Kabayatanna, inbatad ti nasao a wildlife center a no addaan to daytoyen ti naan-anay a pigsa tapno agbiag a maymaysa, mabalin to daytoyen a maparuk-atan ken isubli iti naggapoanna.
