LAOAG CITY – Nangikeddeng ti Department of Agriculture (DA) ti deadline agingga ti tapos ti tawen para iti mandatory a panangparehistro ti amin a bodega ken pasilidad a pangidulinan wenno pag-imbakan dagiti produkto ti agrikultura ken pagkalapan.
Basar iti ahensia, masapul a makumpleto ti panangparehistro ken dagiti kasapulan a requirements agingga Disiembre 31 ita a tawen.
Maiwaywayat ti registration iti babaen ti Registry System for Agri Storage (RSAS), maysa a centralized platform para iti imbentario ken lokasyon dagiti nakadulin a proyekto.
Gagem ti sistema a matulungan ti gobierno a makagun-od ti umno a datos iti volume dagiti imported a produkto ti agricultural, partikular ti bagas.
Nakalaon daytoy iti Republic Act No. 12022 wenno ti Anti-Agricultural Economic Sabotage Act a gagemna a malappedan ti smuggling,hoarding ken dadduma pay nga iligal nga aktibidad iti merkado.
Basar iti linteg ken iti Department of Agriculture Memorandum Circular No. 3, series of 2026, masapul nga agparehistro dagiti agtagikua ti pasilidad ken pagtalinaeden nga umno ti rekord iti uneg ti lima a tawen.
Nupay kasta, inlawlawag ti ahensia nga agsina ti registration iti inspection ken naikeddeng payen ti nationwide schedule iti 2027 para iti monitoring dagiti pasilidad.
