LAOAG CITY – Nalukatenen iti publiko ti Pasalubong Center a masarakan iti livelihood center iti ili ti Pinili.
Daytoy ket babaen ti panagtitinnulong da Vice Governor Mathew Marcos Manotoc, Mayor Rommel Labasan, Vice Mayor Maynard Francis Bumanglag ken dagiti dadduma pay nga opisial.
Segun ken ni Mayor Rommel Labasan, ti pannakaaramid iti nasao a Pasalubong Center ket tapno maiyamammo iti publiko dagiti nagduduma a produkto nga aramid dagiti Micro, Small, and Medium Enterprises (MSMEs) iti nasao nga ili.
Inbatadna a ti kangrunaan a makita ditoy ket dagiti produkto nga abel a personal nga aramid ni Nana Magdalena Gamayo, maysa kadagiti living treasure ditoy pagilian a Pilipinas.
Kunana a daytoy key maysa a simbolo iti panagkaykaysa ti panangitandudo iti lokal nga agrikultura ken negosio dagiti umili.
Mainaig iti daytoy, dinakamat ni Labasan a dagiti tunggal gatangen a produkto ti publiko ket dakkel a tulong para kadagiti mannalon, artisans ken MSMEs.
Kabayatanna, impakaammona a silulukat iti Pinili Pasalubong Center iti aldaw ti Lunes aginnga iti Biernes oras iti alas-8 ti bigat aginnga iti alas-5 ti malem.
