Nagballaag ti Department of Social Welfare and Development (DSWD) a mabalin nga agsungbat iti linteg dagiti indibidual a mangdildillaw kadagiti person with disability wenno PWD, kasta payen kadagiti social media.
Daytoy ket kageddan ti kontrobersia iti Machong Chismisan podcast kalpasan a pagkakatawaan dagiti host ti anak ni Kris Aquino a ni Josh Aquino.
Segun ken ni Department of Social Welfare and Development (DSWD) Spokesperson Assistant Secretary Irene Dumlao, a saan a rumbeng a pagkakatawaan wenno usaren para iti online engagement ti kondision ti maysa nga indibidual, pakairamanan dagiti adda autism spectrum.
Iti babaen ti Republic Act 7277 wenno Magna Carta for Persons with Disabilities a naamendaran ti Republic Act 9442 no sadinno a maipawil ti pananguyaw ken panangirurumen kadagiti Persons with Disabilities.
Kabayatana, naikkaten ti kontrobersial a podcast episode ken nagkiddaw ti despensar dagiti host.
